2009 оны 5 сарын 9 өдөр. Бурхны шашин хөгжсөн олон оронд энэхүү өдрийг Бурхан багшийн төрсөн өдөр хэмээн өргөн тэмдэглэж, буян номыг ихээр үйлддэг ажээ. Улаанбаатар хотод хааяа хааяа цас хаялан ихээхэн хүйтэн байсан боловч Төв цэнгэлдэх хүрээлэнг зорьсон сүсэгтэн олны урсгалыг зогсоосонгүй. Энд бурхан шашныг дээдлэн олон нийтийн сэтгэл зүрхийг ариусгах зорилготой "Сэтгэлийн амарлингуй сан"-гаас зохион байгуулж буй "Гэрэлт зул өргөх ёслол” болж 8000 зул өргөн, ард иргэдийн сайн сайхны төлөө бясалгал үйлдэж, ном хуран 2000 орчим гэрэлт зул тэнгэрт хөөргөсөн шашин номын томоохон арга хэмжээ болж өнгөрлөө.